சவுதி அரேபியாவின் ஜித்தா நகரில் இயங்கி வரும் அதிராம்பட்டினம் நலச்சங்கமான அய்டா (AYDA - Jeddah) அமைப்பின் சார்பில், குளிர்கால சிறப்பு ஒன்றுகூடல் (இஸ்திராஹா) நிகழ்வு நேற்று (20.11.2026 - வெள்ளிக்கிழமை) மிகச் சிறப்பாகவும் உற்சாகமாகவும் நடைபெற்றது. காலை 9:00 மணியளவில் வருகைப்பதிவு மற்றும் வரவேற்புரையுடன் தொடங்கிய இந்நிகழ்வில், ஜித்தா மற்றும் அதன் சுற்றுவட்டாரப் பகுதிகளில் வசிக்கும் நூற்றுக்கும் மேற்பட்ட அதிரை சகோதரர்கள் தங்கள் குடும்பத்தினருடன் ஆர்வமுடன் கலந்து கொண்டனர்.

நிகழ்வின் முக்கிய சிறப்பம்சமாக, சிறுவர் மற்றும் சிறுமியரின் ஆன்மீக மற்றும் அறிவுத் திறனை ஊக்குவிக்கும் வகையில் 12 வயதுக்குட்பட்டோருக்கான கிராஅத் (குர்ஆன் ஓதும்) போட்டி தஜ்வீத் மற்றும் ராகத்தின் அடிப்படையில் நடத்தப்பட்டது. அதனைத் தொடர்ந்து, 12 முதல் 15 வயதுக்குட்பட்ட மாணவ, மாணவியருக்கான பேச்சுப் போட்டி நடைபெற்றது. இதில் 'ஒழுக்கமே ஒரு மனிதனின் உண்மையான அழகு', 'நபிகள் நாயகம் (ஸல்) காட்டிய நல்லொழுக்கம்', 'பெற்றோரைப் பேணுவோம்; சொர்க்கத்தைப் பெறுவோம்', 'உண்மை பேசுவோம் உயர்ந்து வாழ்வோம்', 'இஸ்லாமும் விஞ்ஞானமும்', 'நமது நாட்டின் சுதந்திர வெற்றிக்காக முஸ்லிம்கள் ஆற்றிய பங்கு' மற்றும் 'இந்திய முஸ்லிம்களின் கல்வியும் சமூகப் பங்களிப்பும்' ஆகிய தலைப்புகளில் குழந்தைகள் மிகச் சிறப்பாக உரையாற்றி அனைவரையும் கவர்ந்தனர்.

மேலும், காலை நேரத்தில் நீச்சல் மற்றும் விளையாட்டு நிகழ்வுகளும், ஜும்ஆ தொழுகைக்குப் பின்னர் பெரியவர்கள் மற்றும் சிறியவர்களுக்கான பல்வேறு சுவாரசியமான போட்டிகளும் உற்சாகமாக நடத்தப்பட்டன. மதியம் மற்றும் இரவு நேரங்களில் அனைவரும் ஒன்றாக அமர்ந்து உணவருந்தும் வகையில் அறுசுவை விருந்து ஏற்பாடு செய்யப்பட்டிருந்தது. தாயகத்தை விட்டுப் பிரிந்து வாழும் உறவுகள் ஒரே குடும்பமாக இணைந்து உரையாடி மகிழ்ந்த தருணம் அனைவரையும் நெகிழ்ச்சியில் ஆழ்த்தியது.

நிகழ்வின் நிறைவாக, பல்வேறு போட்டிகளில் வெற்றி பெற்றவர்களுக்கும், பங்கேற்ற அனைத்துக் குழந்தைகளுக்கும் பாராட்டுகளும் பரிசுகளும் வழங்கி கௌரவிக்கப்பட்டன. அதிரை உறவுகளிடையே ஒற்றுமையையும், சகோதரத்துவத்தையும் வலுப்படுத்தும் நோக்கில் இந்த நிகழ்வை மிக நேர்த்தியாக ஏற்பாடு செய்திருந்த அய்டா (AYDA - ஜித்தா) நிர்வாகிகளுக்கும், தன்னார்வலர்களுக்கும் பங்கேற்ற அனைவரும் தங்களது மனமார்ந்த நன்றிகளையும் பாராட்டுகளையும் தெரிவித்துக் கொண்டனர்.